1  Lavdërimi i përket Allahut, Zotit të botëve! 

2  O Zot,
           Ty Të përket lavdërimi!
           Sajues i qiejve dhe tokës!
           Zotërues i madhështisë e bujarisë!
           Zot i zotërive!
           Objekt adhurimi i çdo adhuruesi!
           Krijues i çdo krijese!
           Trashëgues i gjithçkaje! 
           Si Ai nuk është asgjë, 
                     Atij nuk i shmanget dija e asgjëje, 
                     Ai rrok gjithçka, 
                     dhe është mbikëqyrës mbi çdo gjë. 

3  Ti je Zoti,
                     nuk ka zot veç Teje,
                     Uniku, i Vetmi,
                     i Njëjësishmi, i Veçuari. 

4             Ti je Zoti,
                     nuk ka zot veç Teje,
                     Bujari, Dorëgjeri,
                     Fuqiploti, i Tejlartësuari,
                     Madhështori, i Madhëruari Madhërisht. 

5             Ti je Zoti,
                     nuk ka zot veç Teje,
                     Më i Larti, i Mbilartësuari,
                     i Fuqishmi në aftësi. 

6             Ti je Zoti,
                     nuk ka zot veç Teje,
                     i Gjithmëshirshmi, Plotmëshiruesi,
                     i Gjithdijshmi, i Gjithurti. 

7             Ti je Zoti,
                     nuk ka zot veç Teje,
                     Gjithdëgjuesi, Gjithshikuesi,
                     i Përhershmi, i Plotvetëdijshmi. 

8             Ti je Zoti,
                     nuk ka zot veç Teje,
                     Bujari, Më Bujari,
                     i Amshueshmi, i Përjetësishmi. 

9             Ti je Zoti,
                     nuk ka zot veç Teje,
                     i Pari përpara gjithkujt,
                     i Fundit pas çdo numri. 

10             Ti je Zoti,
                     nuk ka zot veç Teje,
                     i Afërti në lartësinë e Tij,
                     i Larti në afrinë e Tij. 

11             Ti je Zoti,
                     nuk ka zot veç Teje,
                     Zotërues i shkëlqimit dhe lavdisë,
                     madhështisë dhe lëvdimit. 

12             Ti je Zoti,
                     nuk ka zot veç Teje.
                     Ti i ke sjellë gjërat në jetë pa rrënjë,
                               ke formuar ç’ke formuar pa asnjë shembull,
                               dhe sajuar të sajuarat pa asnjë kufizim. 

13  Ti je Ai
                     që e ka urdhëruar çdo gjë me një urdhërim, 
                     lehtësuar çdo gjë me një lehtësim, 
                     e sunduar gjithçka nën Vete me një sundim. 

14             Ti je Ai
                     që asnjë shok s’Të jep dorë në krijimin Tënd
                     e asnjë vizir nuk Të ndihmon në drejtimin Tënd.
                     Ti s’ke as dëshmues e as të barabartë. 

15            Ti je Ai
                     që deshi,
                               e ajo që deshe ishte e patundshme,
                     që dekretoi,
                               dhe ajo që dekretove ishte e drejtë,
                     që vendosi,
                               dhe ajo që vendose ishte e ndershme. 

16             Ti je Ai
                     që vendi s’e përmban,
                      para autoritetit të të Cilit nuk ngrihet autoritet,
                     dhe të cilin nuk e ndal asnjë provë apo shpjegim. 

17             Ti je Ai
                     që ka njehsuar gjithçka në numra, 
                     i ka caktuar çdo sendi afat
                     dhe ka urdhëruar çdo gjë me urdhërim. 

18             Ti je Ai
                      para thelbshmërisë së të cilit përfytyrimet mbeten mangut,
                      përpara modalitetit të të cilit të kuptuarit nuk kanë aftësi,
                      dhe vendin e pozicionit të të cilit sytë s’e shohin dot. 

19             Ti je Ai
                     që s’ka kufi, 
                               ndryshe kufizohesh,
                     që nuk shëmbëllehet,
                               ndryshe lokalizohesh,
                     që nuk lind,
                               ndryshe lindet. 

20             Ti je Ai
                     që nuk ka të kundërt,
                               ndryshe konkurron me Ty,
                      që nuk ka të barabartë,
                               ndryshe të garojë me Ty,
                     që nuk rival,
                               ndryshe të Të bëjë qëndresë. 

21             Ti je Ai
                     që nisi, sajoi,
                     nxori, filloi,
                     dhe e bëri mirë gjithë çka bëri. 

22  Lavdi paç!
                     Sa e madhërishme pozita Yte!
                     Sa i lartë vendi Yt mes vendeve!
                     Sa pastër çan Ndarësi yt me të vërtetën! 

23             Lavdi paç!
                     I Buti - sa i butë je!
                     Përdëllitësi - sa përdëllitës je!
                     I Urti - sa i dijshëm je! 

24             Lavdi paç!
                     Mbreti - sa i pathyeshëm je!
                     Bujari - sa përplot Ti je!
                     I Lartësuari - sa i lartësuar je!
                     Zotërues i rrezatimit dhe lavdisë,
                               madhështisë e lavdërimit! 

25             Lavdi paç!
                     E ke zgjatur dorën me gjëra të mira,
                               dhe prej Teje është njohur udhëzimi,
                     ndaj kush Të lyp fenë ose dynjanë
                               do të Të gjejë Ty. 

26             Lavdi paç!
                     Gjithçka që kalon në dijen Tënde Të nënshtrohet Ty,
                     të gjithë nën Fronin Tënd përulen para gjithpushtetit Tënd,
                     dhe çdonjë nga krijesat e Tua Të ndjek e nënshtruar. 

27             Lavdi paç!
                     As ndijohesh, as prekesh,
                               as ndjehesh, as mashtrohesh,
                               as pengohesh, as sfidohesh,
                               as të dilet mbanë, as të rezistohet,
                               as të hidhet dot e as nuk të kalohet. 

28             Lavdi paç!
                     Udha jote është truall i lëmuar,
                     urdhri Yt drejtudhëzim,
                     dhe Ti je strehë e gjallë, e amshuar. 

29             Lavdi paç!
                     Fjala Jote është vendimtare,
                     urdhërimi Yt i patundur,
                     vullneti Yt vendimtar. 

30             Lavdi paç!
                      Askush s’Ta kundërshton dëshirën,
                     asnjë s’T’i ndryshon dot fjalët. 

31             Lavdi paç,
                     Verbues në shenja,
                     Krijues i qiejve,
                     Sajues i shpirtrave! 

32  Ty Të përket lavdërimi,
                     një lavdërim që do jetë i amshueshëm me amshueshmërinë Tënde! 

33             Ty Të përket lavdërimi,
                     një lavdërim i përhershëm me nderën Tënde! 

34             Ty Të përket lavdërimi,
                     një lavdërim që do i shkojë përkrah mirëbërjes Tënde! 

35             Ty Të përket lavdërimi,
                     një lavdërim që do ta rrisë të mirën kënaqësi Tënde! 

36             Ty Të përket lavdërimi,
                     një lavdërim megjithë lavdërimin e çdo lavdëruesi
                               dhe një të falënderuar, të cilit i rri mangut
                               të falënderuarit e çdo falënderuesi; 

37                       një lavdërim që s’është me vend për tjetërkënd veç Teje
                               dhe përmes të cilit s’i kërkohet afri kujt tjetri veç Teje; 

38                       një falënderim që do ta përherësojë të parën [begati]
                               dhe do sjellë përhershmërinë e të fundit; 

39                       një lavdërim që do shumëzohet me rrotullimin e kohërave
                               dhe do rritet me dyfishime të njëpasnjëshme; 


40                        një lavdërim që mbikëqyrësit nuk do ta numërojnë dot
                               dhe tejkalon atë që numërojnë shkruajtësit në Librin Tënd; 

41                       një lavdërim që do ta kundërpeshojë Fronin Tënd të lavdishëm
                               dhe barazojë Kursiun Tënd të ngritur; 

42                       një lavdërim, shpërblimi i të cilit tek Ti do të jetë i plotë
                                dhe shlyerja e të cilit do përfshijë çdo shlyerje; 

43                       një lavdërim, e jashtmja e të cilit i përkon të brendshmes,
                               dhe e brendshmja e të cilit përkon me synim të drejtë; 

44                       një lavdërim si ai me të cilin askush s’Të ka lavdëruar
                               dhe shkëlyshmërinë e të cilit s’e njeh askush veç Teje; 

45                       një lavdërim në të cilin kush mundohet të Ta shumëfishojë lavdërimin
                               do të ndihmohet
                               dhe ai që tërheq harkun në kulm për ta përmbushur 
                                         do të konfirmohet; 

46                       një lavdërim që do t’i 
                               mbledhë tërë lavdërimet që ke krijuar
                               e lidhë tok gjithë ç’do krijosh më pas; 

47                       një lavdërim më të afërt se i cili asnjë lavdërim nuk është me fjalën Tënde
                               e më i madh se i cili nuk është asnjë, nga kushdo që Të lavdëron; 

48                       një lavdërim plotësia e të cilit do të obligojë rritje
                                         përmes bujarisë Tënde
                               dhe të cilit do t’i shtosh rritje pas rritjeje
                                         si hir nga Ti; 

49                       një lavdërim që do t’i shkojë bujarisë së fytyrës Tënde
                               dhe do takojë fuqinë e madhërisë Tënde! 

50  Zoti im,
                     bekoje Muhammedin dhe Familjen e Muhammedit,
                                         të shquarit, të zgjedhurit,
                                         të nderuarit, të afruarit,
                               me më të shkëlqyerin bekim Tëndin,
                     begatoje
                               me më të plotin begatim Tëndin,
                     e mëshiroje
                               me më të shijueshmin mëshirim Tëndin! 

51             Zoti im,
                     bekoje Muhammedin dhe Familjen e tij
                     me një bekim të frytshëm,
                               më të frytshëm se i cili tjetër s’ka!
                     Bekoje
                     me një bekim rritës,
                               më rritës se i cili tjetër s’ka!
                     Dhe bekoje
                     me një bekim kënaqës,
                               përtej të cilit tjetër s’ka! 

52             Zoti im,
                      bekoje Muhammedin dhe Familjen e tij
                      me një bekim
                                që do ta kënaqë 
                                dhe do t’ia rrisë kënaqësinë e mirë!
                      Bekoje
                      me një bekim
                                që do të Të kënaqë
                                e do të Ta rrisë kënaqësinë ndaj Tij!
                      Dhe bekoje
                      me një bekim
                                prej një tjetri nga i cili nuk do kënaqesh për ‘të,
                                e për të cilin nuk sheh të denjë kënd tjetër! 

53             Zoti im,
                     bekoje Muhammedin dhe Familjen e tij
                     me një bekim që do ta 
                               tejkalojë kënaqësinë Tënde të mirë,
                               jetë i vazhdueshëm në vazhdimësinë e tij
                                         përmes të qëndruarit Tënd,
                               pa u harxhuar kurrë,
                                         ashtu siç nuk do harxhohen kurrë fjalë e Tua! 

54             Zoti im,
                     bekoje Muhammedin dhe Familjen e tij
                     me një bekim që do t’i
                               lidhë tok bekimet e
                                         engjëjve të Tu, profetëve të Tu, të dërguarve të Tu
                                         dhe të bindurve të Tu,
                               përfshijë bekimet e shërbëtorëve të Tu,
                                         xhinë a njerëz qofshin,
                                         dhe të denjëve për xhevapin Tënd,
                               e mbledhë bekimet 
                                         e çdonjërit lloj nga krijesat e Tua
                                         që ke krijuar e sajuar! 

55             Zoti im,
                     bekoje Muhammedin dhe Familjen e tij
                     me një bekim
                               që do përfshijë çdo bekim,
                               të shkuar e të ri!
                     Bekoje atë dhe Familjen e tij
                     me një bekim 
                               kënaqës për Ty
                                         e gjithkënd nën Ty
                               që do të sjellë me këto të gjitha
                                         një bekim
                                         me të cilin do i shumëfishosh ato bekime
                                         dhe do i rritësh përmes rrotullimit të ditëve
                                                   me një rritje disafish 
                                                   që s’e numëron dot kush veç Teje! 

56             Zoti im,
                      bekoji më të mirët e Familjes së tij,
                     ata që i ke 
                               zgjedhur për urdhërimin Tënd,
                               caktuar rojtarë të dijes Tënde,
                                         mbikëqyrësit e fesë Tënde,
                                         mëkëmbësit e Tu në tokën Tënde,
                                         dhe argumentet e Tuaja ndaj shërbëtorëve të Tu,
                               dëlirur nga papastërtia e ndytësia
                                         me një dëlirje me dëshirën Tënde, 
                               dhe bërë mjet për tek Ti
                                         e rrugë për te Kopshti Yt! 

57             Zoti im,
                      bekoje Muhammedin dhe Familjen e tij
                     me një bekim që
                               i bën të bollshme dhuratat e bujarinë Tënde,
                                përsos për ta dhurimet e shpërblimet e Tua,
                               e ua mbush hisën në veprimet e Tua të mirësishme dhe dobitë! 

58             Zoti im,
                      bekoje atë dhe Familjen e tij
                      me një bekim
                                i pari i të cilit s’ka afat,
                                afati i të cilit s’ka kufi,
                               dhe i fundit nga i cili nuk ka fund të skajshëm! 

59             Zoti im,
                      bekoji ata sa
                               pesha e Fronit Tënd dhe e gjithçkaje nën të,
                               sasia që mbush qiejt dhe gjithçka mbi to,
                                numri i tokave të Tua dhe gjithçka nën to e mes tyre,
                     një bekim që do të T’i sjellë pranë në afërsi,
                               do Të kënaqë Ty dhe ata,
                               dhe do u bashkohet të ngjashmëve përjetë! 

60  O Zot,
           Ti, pa dyshim, e ke konfirmuar fenë Tënde në të gjitha kohët
                     me një Imam të cilin ua ke ngritur
                               si shtyllë orientimi shërbëtorëve të Tu
                               dhe fanar në tokat e Tua,
                               pasi litari i tij i është ngjitur Tëndit!
           Ti e ke cakuar si mjet për te kënaqësia Jote e mirë,
                     dhe bërë bindjen ndaj Tij të detyrimtë,
                     ke paralajmëruar kundër mosbindjes ndaj tij,
                     dhe urdhëruar
                               ndjekjen e urdhrave të tij,
                               lënien e ndalimeve të tij,
                               e që asnjë ecës përpara të mos e kalojë
                               ose mbetës prapa të mos i mbesë pas! 
                     Ai, pra është ruajtja e strehëkërkuesve,
                               shpella e besimtarëve,
                               doreza e përkrahësve,
                               dhe rrezëllimi i botëve! 

61  O Zot,
           frymëzoje, pra mbikëqyrësin Tënd të falënderojë
                     për atë në çfarë e ke favorizuar,
           frymëzona me të ngjashmen ndaj tij,
           jepi një autoritet që ta ndihmojë, 
           hapi një hapje të lehtë, 
           ndihmoje me shtyllën Tënde më të fortë,
           mblidhja shpinën, 
           forcoja krahun, 
           ruaje me syrin Tënd,
           mbroje me mbrojtjen Tënde,
           ndihmoje me engjëjt e Tu,
           e mbështete me trupat e Tua më ngadhënjimtare! 

62  Përmes tij
           vendose Librin Tënd, kufijtë e Tu, ligjet e Tuaja,
                     dhe normat e Sunnetit të të Dërguarit Tënd
                               (bekimet e Tuaja, O Zot,
                               qofshin mbi të dhe Familjen e tij),
           gjallëroji shtyllat orientuese të d?nit Tënd,
                      të përvdekura nga zullumqarët,
           kruaje ndryshkun e padrejtësisë nga udha Jote,
           site fatkeqësinë nga rruga Jote,
           asgjësoji të shmangurit nga shtegu Yt,
           e fshiji kërkuesit e të shtrembtës në të drejtën Tënde! 

63  Zbutja anën ndaj miqve të Tu,
           zgjatja dorën mbi armiqtë e Tu,
           jepna
                     përdëllimin e tij, mëshirën e tij,
                     butësinë e tij, dhembshurinë e tij,
           e bëna
                     dëgjuesit dhe të bindurit e tij,
                     përpjekësit drejt kënaqësisë së tij të mirë,
                     mbështetësit në të ndihmuarit dhe mbrojturit e tij,
                     dhe të afruarit përmes kësaj tek Ti
                                                   e i Dërguari Yt
                               (bekimet e Tua, O Zot,
                               qofshin mbi të dhe Familjen e tij). 

64  O Zot,
           dhe bekoji
                     miqtë [e Imamëve],
                     dëshmuesit e pozitës së tyre,
                     mbajtësit e drejtimit të tyre,
                     ndjekësit e traseve të tyre,
                     të kapurit pas dorezës së tyre,
                     aderuesit në wilajetin e tyre, 
                     pasuesit e Imametit të tyre,
                     të nënshtruarit ndaj urdhrit të tyre,
                     përpjekësit në të bindurit atyre,
                     pritësit e ditëve të tyre,
                     drejtuesit e syve kah ‘ta,
            me bekime të bekuara, të kulluara, rritëse,
                     të freskëta, kundërmuese! 

65             Jepu atyre dhe shpirtrave të tyre paqe,
            mblidhua çështjen në frikënderim,
           vendosua gjendjet për vijë,
           kthehu nga ata,
                     Sigurisht, Ti je i Gjithkthyeshëm, Gjithmëshirues
                     e Më i Miri i falësve,
           dhe vendosna me ta në Banesën e Paqes, 
                     me mëshirën Tënde,
                     O Më i Mëshirshmi i mëshiruesve! 

66  O Zot,
           kjo është Dita e ‘Arafatit,
                     të cilën e ke fisnikëruar, nderuar e madhëruar.
            Brenda saj ke përhapur mëshirën Tënde,
                     treguar mirësi me faljen Tënde,
                     e bërë të bollshme dhënien Tënde,
                     dhe përmes saj je treguar i begatë ndaj shërbëtorëve të Tu. 

67             Unë jam shërbëtori Yt, të cilin e favorizove para se ta krijoje
                     dhe pasi e krijove.
           E bëre ndër ata që i ke
                      udhëzuar në d?nin Tënd,
                      dhënë sukses në përmbushjen e hakut Tënd,
                     ruajtur me litarin Tënd,
                     përfshirë në palën Tënde,
                     drejtuar së duhuri për të miqësuar miqtë e Tu
                               dhe për t’u treguar hasmëri armiqve të Tu. 

68             Atëherë e urdhërove,
                     por ai s’i ndoqi urdhëresat e Tua,
           e kufizove,
                     por ai s’ua vuri veshin kufizimeve të Tuaja,
           ia ndalove mosbindjen ndaj Teje,
                     por ai Ta shkeli urdhrin duke bërë ç’i ke ndaluar,
           jo për të Të kundërshtuar,
                     e as krenari ndaj Teje për të treguar;
           përkundrazi, kapriçoja e thirri
                     për tek ajo të cilën ia kishe veçuar e ndaj të cilës kishe paralajmëruar,
                     dhe në këtë u ndihmua nga armiku Yt e i tiji.
           Kështu vazhdoi me ‘të
                     duke e ditur kërcënimin Tënd,
                     shpresuar ndjesën Tënde,
                     i mbështetur në të përmbajturit Tënd,
           ndonëse ndër shërbëtorët e Tu e kishte më për detyrë
                     - duke parë mirësinë Tënde ndaj tij -
                     të mos vepronte kështu. 

69  Ja ku jam, pra, para Teje,
           i urryer, i ulët, i përulur, i mjerë, i frikuar,
           tek dëshmoj mëkatet e tmerrshme, me të cilat jam ngarkuar 
                     dhe shkeljet e mëdha që i kam vepruar,
           duke kërkuar hijerore në faljen Tënde,
           lypur strehë në mëshirën Tënde,
           i sigurtë se
                     asnjë dhënës hijeroreje s’do më japë hijerore prej Teje
                     e asnjë pengues s’do më pengojë nga Ti. 

70             Ndaj vepro mirësisht ndaj meje,
                     ashtu siç vepron mirësisht
                     duke e mbuluar atë që kryen mëkate,
           ji dorëgjerë ndaj meje,
                     ashtu siç je dorëgjerë
                     duke e ndjerë atë që Të rrëzohet përpara,
           dhe trego mirësi ndaj meje,
                     ashtu siç nuk është asgjë e madhe për Ty të tregosh mirësi
                     duke e falur atë që shpreson te Ti me pritshmëri! 

71  Caktomë në këtë ditë një racion
                     me të cilin të mund të arrij
                     një hise të kënaqësisë Tënde të mirë,
           e mos më nis mbrapsht të skamur
                     prej asaj me të cilën kthehen adhuruesit e Tu
                     nga mesi i shërbëtorëve të Tu! 

72             Ndonëse nuk kam çuar para
                     veprat e drejtësishme
                     që kanë çuar ata,
           kam çuar pohimin e Unitetit Tënd
                     dhe të mohuarit nga Ti
                     të të kundërtëve, rivalëve dhe të ngjashmëve,
           Të kam ardhur përmes hyrjeve
                     me të cilat ke urdhëruar 
                     që njerëzit të vijnë,
           dhe kam kërkuar afri ndaj Teje
                     përmes asaj që pa kërkuar afri me të
                     s’arrin kush afri me Ty. 

73             Atëherë i ndoqa këto të gjitha
           me kthim të rishtë kah Ti,
           përulësi e poshtërim para Teje,
            opinion të mirë për Ty,
           e besim në ç’është me Ty;
            dhe i bashkova shpresën në Ty,
                      ngase kush shpreson në Ty
                     zor se zhgënjehet! 

74             Të lypa me lypjen e
                      të keqit, të ulëtit,
                      të vajtueshmit, të varfrit,
                      të frikuarit, kërkuesit të hijerores;
            e gjitha kjo në drojë e lutje
                      duke kërkuar mbrojtje e lypur strehë,
            jo kryelartë me krenarinë e krenarit,
                      as vetëlartues me guximin e të bindurit,
                      e as mendjemadh për ndërmjetësimin e ndërmjetësuesve. 

75            Se jam akoma më i pakti i të paktëve
                      dhe më i ulëti i të ultëve,
                      si një grimcë pluhuri a më pak!
            O Ai që s’i ngut keqbërësit
                                e as i shtrëngon jetuesit në rehati! 
                      O Ai që tregon mirësi duke i liruar të ngecurit
                                dhe begati të shlirë duke ua shtyrë shkelësve! 

76             Unë jam keqbërësi, rrëfyesi, shkelësi, i ngecuri! 

77             Jam ai që ishte i pacipë ndaj Teje si i paturpi! 

78             Unë jam ai që T’u mosbind me paramendim! 

79             Jam ai që e fshehu veten nga shërbëtorët e Tu
                     dhe T’u shfaq plot zhurmë! 

80             Unë jam ai që u tmerrua nga shërbëtorët e Tu
                     dhe u ndi i sigurtë nga Ti! 

81             Jam ai që nuk iu druajt ndëshkimit Tënd
                     e s’iu frikua rreptësisë Tënde! 

82             Unë jam shkelësi ndaj vetes! 

83             Dhe pengu i fatkeqësisë së vet! 

84             Unë jam mangut në turp! 

85             I venduar jam në vuajtje! 

86              Për hakun e atij që e ke dalluar
                                në mesin e krijimit Tënd
                      dhe pasha atë që e ke zgjedhur
                                për Vete!
            Për të drejtën e atij që ke përzgjedhur
                                nga krijesat e Tua
                     dhe pasha atë që e ke tërhequr
                                për detyrën Tënde!
           Për të drejtën e atij, bindjen ndaj të cilit ia ke bashkuar 
                                të bindurit Ty,
                     dhe pasha atë, mosbindjen ndaj të cilit e ke bërë
                               si të mosbindurit Ty!
           Dhe për të drejtën e atij, miqësinë e të cilit e ke lidhur
                                me miqësinë Tënde
                     dhe pasha atë, hasmërinë e të cilit e ke lidhur 
                               me hasmërinë Tënde!
            Mbulomë në këtë ditë timen,
                     me atë që Ti mbulon
                                kë Të lutjet me ëndje
                                          duke hequr dorë
                                dhe atë që kërkon mbrojtje në faljen Tënde
                                          duke u penduar! 

87             Kujdesu për mua
                     me atë përmes të cilës je kujdesur për njerëzit e
                               bindjes ndaj Teje,
                                afrisë me Ty,
                               dhe rangut tek Ti! 

88             Veçomë,
                     siç ke veçuar atë që
                               plotëson zotimin Tënd,
                               lodhet vetëm për hirin Tënd,
                               dhe mundohet për kënaqësinë Tënde të mirë! 

89  Mos më qorto për
           shpërfilljen ndaj Teje,
           shkeljen e cakut në kufijtë e Tu,
           dhe daljen jashtë urdhëresave të Tua! 

90  Mos më tërhiq pak nga pak duke më dhënë pushim, 
           si tërheqja pak nga pak 
           e atij që ma refuzon të mirën që ka
           duke mos ndarë me Ty në lëshimin e favorit mbi mua! 

91  Ngritmë nga
           gjumi i të pavëmendshmit,
           kotja e shkapërdarit,
           dhe dremitja e të braktisurit! 

92  Çoma zemrën në atë tek e cila ke
           punësuar të devotshmit,
           pushtuar adhuruesit,
           dhe shpëtuar të shkujdesurit! 

93  Më jep mbrojtje nga ajo që do më
           mbajë larg Teje,
           vijë mes meje dhe hisës time nga Ti,
           dhe ndalomë nga ajo për të cilën mundohem në Ty! 

94  Lehtësoma
           rrugën e veprave të mira drejt Teje,
           rendjen drejt tyre nga aty ku ke urdhëruar,
           dhe të lakmuarit e tyre siç ke dëshiruar! 

95  Mos më fshij bashkë me
           ata që Ti i fshin
           për marrjen me të lehtë të asaj që ke premtuar! 

96  Mos më shkatërro me
           ata që i shkatërron
           pse i shpalosen urrejtjes Tënde! 

97  Mos më asgjëso mes
           atyre që i asgjëson
           për dalje nga rrugët e Tua! 

98  Nxirrmë nga përmbytjet e sprovës,
           shpëtomë nga gurmazet e belasë,
           dhe jepmë hijerore nga kaplimi prej pushimit! 

99  Eja mes meje dhe hasmit që më kequdhëzon,
           kapriços që më rrënon,
           dhe dështimit që më mposht! 

100  Mos m’u kthe mënjanë
           me të kthyerit mënjanë në zemërim
           ndaj atij prej të cilit s’je i kënaqur! 

101  Mos më bëj të shkurajohem në pritje nga Ti,
           se ndryshe do më mposhtë dëshpërimi në mëshirën Tënde! 

102  Mos më jep çfarë s’mund të mbart,
           se ndryshe do m’rëndosh
           me teprinë e dashurisë Tënde që m’ke ngarkuar! 

103  Mos më nis nga dora Jote,
           dërgimin e atij që s’ka asnjë të mirë,
           ndaj të cilit nuk ke asnjë nevojë,
           dhe i cili nuk [Të] kthehet! 

104  Mos më flak me flakjen e atij që ka
           rënë nga syri i konsideratës Tënde
           dhe është mbështjellë në degradim prej Teje!
           Në vend të kësaj, kapma dorën ndaj
           rënies së të ngecurve,
           shqetësimit të devijuesve,
           rrëshqitjes së të mashtruarve,
           dhe hallin e të mbaruarve! 

105  Liromë nga ajo me të cilën ke pllakosur
           rangjet e shërbëtorëve dhe shërbëtoreve të Tuaja
    dhe më bëj të arrij gradat më të larta të atij
           për të cilin kujdesesh,
           ndaj të cilit tregon favor,
                     dhe me të cilin je i kënaqur,
           ashtu që ta lësh të rrojë si i lavdërueshëm
                     e ta marrësh tek Ti si të lumturueshëm! 

106  Mbështillmë me qaforen e të përmbajturit nga ajo që
           i bën veprat e mira të dështojnë
           dhe largon bekimet! 

107  Përcilli zemrës time vetpërmbajtje para
           punëve të shëmtuara të së ligës
           dhe prapësive të turpshme! 

108  Mos më devijo
           me çfarë s’mund ta arrij veçse përmes Teje
           nga kryerja e asaj që Të kënaq veç Ty me mua! 

109  Çrrënjosma nga zemra dashurinë për këtë botë të ulët,
           që pengon nga gjithë çka është me Ty,
           ndal nga kërkimi i ndërmjetësisë tek Ti, 
           dhe huton nga përpjekja për afri me Ty! 

110  Zbukuroma vetminë
           në lutje të pëshpëritur Ty
           natën dhe ditën! 

111  Jepmë një ruajtje që do më
           afrojë te tmerri nga Ti,
           të më shqisë nga kryerja e të bërave haram nga Ti,
           dhe kursejë nga kaplimi prej mëkatesh të tmerrshme! 

112  Jepmë dëlirësi nga fëlliqësia e mosbindjes,
           largoma ndytësinë e shkeljeve,
           vishmë me rrobën e mirëqenies Tënde,
           mbulomë me mantelin e lirimit Tënd,
           mbështillmë me nderet e Tua të shumta,
           dhe vishmë në begatinë e dorëgjerësinë Tënde! 

113  Forcomë me dhënien sukses nga Ti
           dhe të treguarit e rrugës së duhur nga Ti,
           ndihmomë kah synimi i drejtësishëm,
                     fjalët kënaqëse,
                     dhe veprat e miratuara, e mos më lër në dorë të forcës dhe fuqisë time
                     në vend të forcës dhe fuqisë Tënde! 

114  Mos më degrado ditën kur të më ngritësh për të Të takuar,
  mos më turpëro përpara miqve të Tu,
   mos më bëj ta harroj të kujtuarit Tënd,
  mos ma shqit të falënderuarit Tënd,
           por urdhëroma në gjendje të pavëmendjes
           kur injorantët janë shpërfillës ndaj mirësive të Tua,
    dhe frymëzomë që ta
           lëvdoj çfarë ke bërë për mua
           dhe dëshmoj për çfarë m’ke akorduar! 

115  Vendosma përgjërimin ndaj Teje përmbi përgjërimin e përgjëruesve
   dhe lavdërimin Tënd prej meje mbi lavdërimin e lavdëruesve! 

116  Mos më braktis në nevojën për Ty,
           mos më shkatërro për ç’kam bërë për Ty, 
           e mos ma godit vetullën me atë përmes të cilës
                     ua godet vetullën atyre që hahen me Ty,
                     pse unë Të jam nënshtruar.
  E di
           se argumenti është i Yti,
           se Ti i je më pranë begatisë,
                     më i mësuari me bamirësi,
                     i denjë për frikënderim,
                     dhe i denjë për falje, 
           se i je më pranë ndjesës
                     sesa dënimit,
           dhe më pranë të mbuluarit 
                     sesa të përbotuarit! 

117             Lërmë të bëj jetë të këndshme
                     që do lidhë bashkë atë që dëshiroj
                     dhe arrijë atë që dashuroj
                               pa e sjellë ndërkaq atë që Ti s’pëlqen
                               dhe pa kryer atë që e ke ndaluar;
           dhe më bëj të vdes vdekjen e atij
                      drita e të cilit i prin përpara dhe në të djathtën dorë! 

118  Përulmë përpara Teje
                     e lartësomë para krijesave të Tua,
           më ul kur jam i vetëm me Ty
                     e më ngrit mes shërbëtorëve të Tu,
           liromë nga nevoja për atë që s’ka nevojë për mua
                     e ma rrit nevojën dhe varfërinë ndaj Teje! 

119  Merrmë në mbrojë nga
                     përpimja e armiqve,
                     mbërritja e belasë,
                     poshtërimi e vuajtja!
           Mbromë në atë që Ti ma sheh,
                     me mbrojtjen e atij që
                               s’do kishte fuqi ndaj dhunës
                                         po të mos kishte butësi,
                               e do mbërthente për prapësi
                                         të mos kishte mungesë ngutjeje! 

120  Kur t’i dëshirosh një populli ndonjë sprovë ose të keqe,
                     çliromë prej saj, se unë kërkoj strehën Tënde;
           dhe ngase nuk më ke vendosur në ndalesën e paturpësisë
                     në këtë botë Tënden,
           mos më vendos në një ndalesë të tillë
                     në tjetrën! 

121  Bashkomi fillimet e mirësive të Tua me fundet
                     dhe të kahershmet dobiprurje të Tuat me të sapodalat!
           Mos ma zgjat afatin me një zgjatje
                     që do ma ngurtësojë zemrën! 
           Mos më godit me një goditje
                     që do ma largojë rrezëllimin! 
           Mos më vizito me
                     një poshtërsi që do ma zvogëlojë vlerën
                     ose një hijshmëri që do ma mbajë të panjohur rangun! 

122  Mos më frikëso
                     me një frikë që do më dëshpërojë
                     ose një tmerr që do më tmerrojë,
           por bëmë të
                     rri në makth nga kërcënimi Yt,
                     marr masa ndaj moslënies nga Ti të asnjë shfajsimi
                                                   dhe paralajmërimit Tënd,
                     e të dridhem gjatë recitimit të vargjeve të Tua! 

123  Mbushma natën me jetë duke më mbajtur zgjuar në të për
                     të Të adhuruar,
                     vetmi me vigjëlim për Ty,
                     përkushtim vetëm ndaj mbështetjes në Ty,
                     nxjerrje të nevojave të mia para Teje,
                     dhe përgjërim se do ma
                               çlirosh qafën nga Zjarri
                               dhe japësh hijerore nga ndëshkimi Yt,
                                         brenda të cilës rrinë banorët e tij! 

124  Mos më lër të
                     endem si i verbër në paturpësinë time
                     ose i pavëmendshëm në shushatjen time për ca kohë, 
           mos më bëj
                     paralajmërim për atë që merr paralajmërim,
                     dënim shembullor për atë që merr mësim,
                     sprovë për atë që vëren,
           mos sajo ndaj meje bashkë me ata ndaj të cilëve sajon,
           mos më zëvendëso me një tjetër,
           mos ma ndrysho emrin, 
           mos ma shndërro trupin,
           mos më cakto 
                     gazin e botës për krijesat e Tuaja,
                      objekt qesëndie për Veten Tënde,
                     ndjekës të çfarëdogjëje tjetër veç kënaqësisë Tënde të mirë,
                     shërbëtor i përunjët për çfarëdogjë tjetër veç shlyerjes me Ty! 

125  Lërmë ta gjej
                     freskinë e ndjesës Tënde
                     dhe ëmbëlsinë e 
                               mëshirës Tënde,
                               prehjes Tënde,
                               lehtësimit Tënd,
                               dhe kopshtit të haresë Tënde! 
           Lërmë të shijoj,
                     përmes diçkaje nga begatia Jote e pafund,
                     aromën e 
                                të qenit i lirë për çfarë do Ti dhe 
                                të përpjekurit në atë që sjell afri
                                tek Ti dhe me Ty,
           e jepma një dhuratë nga dhuntitë e Tuaja! 

126  Bëma tregtinë fitimprurëse
                     dhe kthimin pa humbje, 
           mbushmë me frikë ndaj pozitës Tënde,
            bëmë të përmallem për takimin me Ty,
           dhe lejomë të pendohem me një pendesë të patundur
                     bashkë me të cilën të mos lësh mëkat të mbetet,
                                                   i vogël a i madh,
                     dhe të mos lësh faje, të hapta a të fshehta! 

127  Çrrënjosma mllefin ndaj besimtarëve nga gjoksi, 
                     lakoma zemrën drejt të vegjëlve,
                     ji ndaj meje sikurse ndaj të drejtësishmëve,
                     stolismë me stolitjen e të përzotshmëve,
                     caktomë
                                përmendje të mirë mes atyre që do vijnë
                               dhe përkujtim të mirë mes breznive të ardhshme,
                     e çomë te rrafshina e atyre që erdhën të parët! 

128  Plotësoje bollëkun e nderës Tënde mbi mua,
           vishmë në bujaritë e saj të rishta,
            mbushma dorën me përfitimet nga Ti,
           drejtoji dhuratat e Tua bujare nga unë,
            bëmë fqinjin e më të mirit nga miqtë e Tu
                     në Kopshtet që ke stolisur për të zgjedhurit e Tu,
            dhe mbështillmë në dhuntitë e Tua fisnike
                     në ndalesat e gatitura për të dashurit e Tu! 

129  Caktomë 
                     një vendprehje tek Ti
                               ku mund të synoj liman në qetësi,
                     dhe një strehim të cilit mund t’i kthehem
                               e të pushoj sytë,
           mos m’i pesho kundër prapësitë e tmerrshme,
           mos më shkatërro në ditën kur provohen të fshehtat, 
           elimino nga unë çdo dyshim e pasiguri,
           caktomë një rrugë në të vërtetën nga çdo mëshirë,
           bëmi të bollshme racionet e dhuratave
                     nga dhënia Jote e shpërblimeve,
           dhe zgjeromi hiset e bamirësisë
                     nga dhurimi i Yt i begatisë! 

130  Bëma zemrën të bindur në atë që është me Ty
                     dhe shqetësimin të lirë për atë që është e Jotja,
           punësomë në atë ku punëson miqtë e Tu të dëlirë,
           ngjyema zemrën në bindjen Tënde kur intelektet shushaten,
           dhe ndërthur brenda meje
                     pavarësinë, përkorjen,
                     lehtësimin, çlirimin,
                     shëndetin, bollëkun,
                     qetësinë dhe mirëqenien! 

131  Mos lejo të më dështojnë
                     veprat e mira
                               nëpërmjet mosbindjes time që i njollos
                      ose kohët private të adhurimit
                               përmes cytjeve të sprovës Tënde!
           Mbroma fytyrën nga të kërkuarit
                               prej kujtdo në botë,
                     dhe largomë nga të lypurit
                               e asaj që është me të pafetë! 

132  Mos më bëj ndihmues të keqbërësve,
                     e as dorë dhe ndihmës të tyrin në fshirjen e Librit Tënd!
           Mbromë nga ku s’e di, me një mbrojtje
                     përmes të cilës të më ruash!
           Hapmi portat e pendesës Tënde, mëshirës Tënde,
                     përdëllimit dhe furnizimit Tënd të pakufi!
                     S’ka dyshim se jam prej atyre që Të përgjërohen!
           Dhe plotësoje favorin Tënd ndaj meje!
                     S’ka dyshim se Ti je më i miri i atyre që tregojnë favor! 

133  Vendose pjesën tjetër të jetës time në haxh dhe ‘umre
                     në kërkim të fytyrës Tënde,
                     O Zot i botëve!
           Dhe Zoti e bekoftë Muhammedin dhe Familjen e tij, të mirët, të dëlirët,
                     dhe paqe pastë mbi të dhe ta, gjithmonë e përjetësisht!